မြရည်နန္ဒာ တန်ဖိုးမျှတအိမ်ရာစီမံကိန်းမှ တိုက်ခန်းပေါင်း (၅၀၀)ကျော် ထပ်မံရောင်းချပေးမည်

Spread the love
  •  
  •  
  •  
  •  
  •  
  •  

မြရည်နန္ဒာ တန်ဖိုးမျှတ အိမ်ရာစီမံကိန်းမှ စတုတ္တအကြိမ်အဖြစ် တိုက်ခန်းပေါင်း (၅၀၀)ကျော် မဲစနစ်ဖြင့် ယခုနှစ်အတွင်း ထပ်မံရောင်းချပေးမည်

မန္တလေးတိုင်းဒေသကြီးအစိုးရအဖွဲ့၊ မန္တလေးမြို့တော်စည်ပင်သာယာရေးကော်မတီမှ အကောင်အထည်ဖော် ဆောင်ရွက်ထားသော မြရည်နန္ဒာ တန်ဖိုးမျှတ အိမ်ရာစီမံကိန်းမှ စတုတ္တအကြိမ်အဖြစ် တိုက် (၂၁)လုံးမှ တိုက်ခန်းပေါင်း (၅၀၀)ကျော်အား မဲစနစ်ဖြင့် ယခုနှစ်အတွင်း ထပ်မံရောင်းချပေးနိုင်ရန် စီစဉ်ဆောင်ရွက်လျက်ရှိကြောင်း မန္တလေးမြို့တော်စည်ပင် သာယာရေးကော်မတီမှ သိရသည်။

“တတိယအကြိမ်အဖြစ် တိုက်(၂၁)လုံးမှ တိုက်ခန်းပေါင်း(၅၈၀)ကျော် ပြီးခဲ့တဲ့ ဇွန်လက ရောင်းချပေးပြီးပါပြီ၊ ဒီနှစ်ထဲမှာပဲ စတုတ္တအကြိမ် တိုက်(၂၁)လုံးမှ တိုက်ခန်းများ ထပ်မံရောင်းချဖို့ရှိပါသေးတယ်။ တိုင်းဒေသကြီးအစိုးရအဖွဲ့ကို တင်ပြပြီး ခွင့်ပြုမိန့်ကျလာရင် ဘယ်အချိန်မှာ ရောင်းချရမလဲသိရမှာပါ။ ထပ်မံရောင်းချမယ့် တိုက် (၂၁)လုံးက တည်ဆောက်ပြီးစီးနေပါပြီ။ ယခုနှစ်မှာ ထပ်မံရောင်းချနိုင်အောင် ဆောင်ရွက်နေပါတယ်”ဟု မန္တလေးမြို့တော်စည်ပင်သာယာရေး ကော်မတီ၊ အဆောက်အအုံနှင့်ကုန်ရုံဌာန ဒုတိယဌာနခွဲမှူး ဒေါ်မျိုးအိအိစိုးက ပြောကြားသည်။

မန္တလေးမြို့တော်စည်ပင်သာယာရေးကော်မတီအနေဖြင့် မြရည်နန္ဒာ တန်ဖိုးမျှတအိမ်ရာစီမံကိန်းမှ တိုက်ခန်းများအား နိုင်ငံ့ဝန်ထမ်းများ၊အငြိမ်းစားဝန်ထမ်းများ၊ကုမ္ပဏီဝန်ထမ်းများနှင့်ပြည်သူများအား နေထိုင်ရေး အဆင်ပြေစေရန် လက်ငင်းငွေချေစနစ်(သို့) အရစ်ကျစနစ်ဖြင့် တိုက်ခန်းများအား ရောင်းချပေးလျက်ရှိကြောင်း သိရသည်။

မန္တလေးမြို့တော်စည်ပင်သာယာရေးကော်မတီအနေဖြင့် မြရည်နန္ဒာ တန်ဖိုးမျှတအိမ်ရာစီမံကိန်းကို ၂၀၁၆ ခုနှစ်တွင် စတင်အကောင်အထည်ဖော် ဆောင်ရွက်ခဲ့ပြီး ၂၀၁၈ ခုနှစ်တွင် ပထမအကြိမ်အဖြစ် တိုက်(၂၈)လုံးမှ တိုက်ခန်းများ၊ ၂၀၁၉ ခုနှစ်တွင် တိုက်(၁၉)လုံးမှ တိုက်ခန်းများ၊ယခုနှစ် ဇွန်လတွင် တတိယအကြိမ်အဖြစ် တိုက်(၂၁)လုံးမှ တိုက်ခန်းများအား နိုင်ငံ့ဝန်ထမ်း၊အငြိမ်းစားဝန်ထမ်း၊ကုမ္ပဏီဝန်ထမ်းနှင့်ပြည်သူများအား မဲစနစ်ဖြင့် ရောင်းချပေးခဲ့ပြီး စတုတ္ထအကြိမ်အဖြစ် တိုက်(၂၁)လုံး မှ တိုက်ခန်းများအား ယခုနှစ်တွင် မဲစနစ်ဖြင့် ထပ်မံရောင်းချပေးနိုင်ရန် စီစဉ်ဆောင်ရွက်လျက်ရှိသည်။

ယခုနှစ် ဇွန်လတွင် ရောင်းချခဲ့သော တိုက်ခန်း (၅၈၆)ခန်းမှ တိုက်ခန်းများ၏ အကျယ်အဝန်းနှင့် ဈေးနှုန်းများမှာ တိုက်ခန်းတစ်ခန်းလျှင် အကျယ်အဝန်း ၆၆၁ စတုရန်းပေရှိကာ ဈေးနှုန်းများအနေဖြင့် မြေညီထပ် တစ်ခန်းလျှင် ငွေကျပ်(၂၈၈.၄)သိန်း၊ ပထမ ထပ်တစ်ခန်းလျှင်(၂၅၇.၅)သိန်း၊ ဒုတိယထပ်တစ်ခန်း လျှင်(၂၃၁.၇၅)သိန်း၊ တတိယထပ်တစ်ခန်းလျှင်(၂၁၁.၁၅)သိန်း၊ စတုတ္ထထပ်တစ်ခန်းလျှင်(၁၉၅.၇)သိန်းနှင့် အပေါ် ဆုံးထပ် တစ်ခန်းလျှင် ငွေကျပ်(၁၈၀.၂၅)သိန်း ဖြစ်ကြောင်း သိရသည်။
သန်းဇော်မင်း


Spread the love
  •  
  •  
  •  
  •  
  •  
  •